Hebrews 1

Jisas i aolonga rintet nge enselre, eneke ini a God Itun

(Vonge 1�2)

God i pasungal ile riong a Itun a Jisas nge mo i sungu i a it nge.

1Nomenga nomenga ako God i pasungal ile riong a ile riong elngare nge, mo o ripot i papulua na nge sovengalo rel relnga a titevirre nge, 2ave ponange ol ake nge nang patopalalnga areke te voth nge, i sung ile riong a it nge, ako nge isivenga Itun, ako i ateal i ve aro i el ur alavusnga mo ini ile. Na a Itun aken imeni, God i pamenu ulue, sepsa, sivemitre na ur alavusnga ako o voth. 3Na Itun aken i patheng patpot ol a God ia malmaling Pen a Urvet anga ako i tolilis. Na ome a God kene o thun inga. Na nge Itun aken ile riong engenga inga, i paengeng ulue, sepsa, sivemitre na ur alavusnga ako o voth, mo o kis inga ole omaing ako i ria i a or nge lale. Na i patopalal ile omaing ako i thep so mo i pavurvur ako aro God ilemi simikal tokokoere ole vothung kerenga, lamo i esa ol a Pen a Urvet la, mo i men ol a God ako aolonga rintet a ilo sei a imeni sivenga nge anga, ini wop ako o papompom i nge.

God Itun a Jisas i mukal nge ensel alavusnga.

4Na i venen re aken, mako i pathengal it ako ve, God Itun aken i mukal rintet nge enselre, ranga ve nge ioning ako God i apet a Jisas nge ve ini Itun, i mukal rintet nge ioning ako i apet ile enselre nge, ako i apet inga or ve, ini ile pakekere. 5Na i venen aken, eneke God i ri nge a Jisas ve,

“Ong ini Tuk,
na tho velpol ol ini Tomom.”
Buk Song 2:7

Ave i ri venen aken nge ensel e avele. Na God ile erere i ritet mun tokokoere ve,

“Aro tho velpol ini Itema,
naro i velpol ini Tuk.”
2 Samuel 7:14

6Na God i pathengal mun ako ve, Jisas i mukal nge enselre, eneke nge ako i pango patu ia tengen ake ru a ulue, i sung ile riong mun e ako a enselre nge ve,

“I sivenga ako aro God ile ensel alavusngare
aro o lotual i.”
Lo 32:43

7Na lemir mire ako ve, God ile enselre ole umong i eksingu eksinga, eneke God isa wom toko e ako aro i wat riong ake a God ile erere nge ve,

“God i oma ile enselre
mo o velpol ranga ve ini thue,
ma i oma ile umonga areken
mo o velpol ranga ve ini won sesenga ile anlileling.”
Buk Song 104:4

8Aveto God i ria Itun ve,

“Evelelnga ong voth ranga ve ini tho a God,
na lom menong e nepes aro i voth evelelnga
ako aro ile vusonga avele,
na lom avrumong nge tokokoere ole vothung i vengveng inga.
9 Na om sagu vothung vengvenga
na num silal vothung kerenga.
Make tho a God,
ako ini lom God,
tho taul poungom ako i ateal ong
mo ong mukal nge or alavusnga
ako o voth tomo nge wong.
Na aken i oma ong
mo lomum i sivenga rintet.”
Buk Song 45:6-7

10Na God i ria mun Itun ve,

“Toko Pomnga,
nomenga nge ur alavusnga opateanga,
ong pamenu tel ulue,
na ong oma mun sepsa nge menum
tomo nge ur alavusnga ako o voth nge.
11 Naro o penthal,
aveto wong, aro ong voth reletun ol
ako aro lom vusonga avele.
Sepsa na ur alavusnga ako o voth nge
aro o negiu ranga ve ini teunong.
12 Mo ong pinmola i
ranga ve ini seltun neginga,
naro ong rorol i nge ponganga
ranga ve ini toko ako i rorol ile teunong neginga.
Aveto wong, ong voth inga venen aken,
na ong eksingu eksinga avele,
naro om tovu po mun aro ile vusonga avele.”
Buk Song 102:25-27

13Na God i ria mun Itun ve,

“Aro ong meno a lok seik me
a menik sivenga nge anga,
i pavurvur ako aro tho paesu lom ngarangre a som thewo.”
Buk Song 110:1

Aveto i ri venen aken nge ensel e avele. 14Na Jisas ako ini a God Itun i mukal venen aken, na i vava nge enselre, e? Ensel alavusnga or ini inga oniong ako ini a God ile ako i pakeu pakea inga or nge ile omaing, mo aro o opoal areko aro o el mimiong ako aro ile vusonga avele a God nge.